12.12.2025
11 dekabr 2025-ci il tarixində Qarabağ Regional Mədəniyyət İdarəsi Füzuli rayon Heydər Əliyev Mərkəzi, Qarabağ Regional Təhsil İdarəsi Füzuli və Xocavənd rayonları üzrə təhsil sektoru və Füzuli Dövlət Peşə Təhsil Mərkəzinin birgə təşkilatçılığı ilə Füzuli rayon Qayıdış qəsəbə 8 saylı tam orta məktəbdə “Heydər Əliyev və Azərbaycan təhsili” adlı tədbir keçirilib. Əvvəlcə ulu öndər Heydər Əliyevin həyat və fəaliyyətindən bəhs edən kitab sərgisinə baxış keçirilib. Tədbir zamanı ulu öndər Heydər Əliyevin və ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. Sonra çıxışlar edilərək ulu öndər Heydər Əliyevin Azərbaycan təhsilinə göstərdiyi diqqət və qayğıdan, ölkəmizdə kadr potensialının formalaşdırılması, gənclərin xarici ölkələrdə təhsil almaları, yeni təhsil müəssisələrinin tikilməsi istiqamətində misilsiz fəaliyyətindən danışılıb, Prezident İlham Əliyev və Birinci vitse-prezident Mehriban xanım Əliyeva tərəfindən dövlət təhsil siyasətinin uğurla davam etdirildiyi qeyd edilib. Daha sonra Qayıdış qəsəbə 8 saylı tam orta məktəbin şagirdlərinin ifasında ulu öndər Heydər Əliyevə həsr edilmiş şeir kompozisiyası təqdim edilib.
Sonda “Heydər Əliyev və Azərbaycan təhsili” adlı videoçarx nümayiş olunub.