18 May 2022- ci il tarixdə Yeni Azərbaycan Partiyası Laçın rayon təşkilatının sədri İlqar İlyasov, YAP fəalları, ərazi partiya təşkilatı sədrləri, təhsil işçiləri və Ağcabədi Regional Mədəniyyət İdarəsi Laçın rayon Mədəniyyət Mərkəzinin (Pircahan, Malıbəy, Zabux, Ağoğlan, Alıqulu, Kamallı, Yuxarı və Aşağı Fərəcan kənd klub və mədəniyyət evləri) rəhbərləri ilə birgə Ağcabədi Regional Mədəniyyət İdarəsi Laçın rayon Tarix - Diyarşünaslıq Muzeyini ziyarət etmişdir. Muzeyin eksponatları ilə tanış olan qonaqlara ətraflı məlumat verən Laçın rayon Tarix - Diyarşünaslıq Muzeyinin direktoru Türkanə Nuruyeva işğaldan əvvəlki dövrü, işğal dövrünü, muzeyə dəymiş ziyanı və mövcud vəziyyəti xarakterzə etdi. Torpaqlarımızın işğalı dövründə muzeyə qarşı düşmənin barbar davranışından söhbət açdı.T. Nuruyeva qeyd edib ki, Laçın rayon Tarix və​ Diyarşünaslıq muzeyi 1974-cü ildən 1992-ci ilin may ayına qədər fəaliyyət göstərmiş, işğal olunmuş muzeylər siyahısına daxil olan yüksək bədii və tarixi səciyyə daşıyan eksponatlarla zəngin olan ən əhəmiyyətli muzeylərdən biridir. Muzeyin əsas fondunda 5 mindən artıq eksponatlar toplanmışdır. 1992-ci ildə Laçın rayonu işğal olunarkən muzeyin eksponatlarını çıxarmaq mümkün olmayıb. Beş mindən çox qiymətli eksponat, talan edilərək Ermənistan Respublikasına aparılıb. Muzey 1992-ci ildən Bakı şəhərində məskunlaşib. Tədbirdə çıxış edən YAP Laçın Rayon Təşkilatının sədri İlqar İlyasov ilk növbədə ərazi bütövlüyümüz uğrunda canlarından keçən şəhidlərimizin əziz xatirələrindən və qəhrəman övladlarımızın döyüş meydanında göstərdikləri şücaətdən danışdı. İ.İlyasov bildirdi ki, 18 may təqvimi işgal günü kimi tarixin arxivində qaldı. Artıq tarix qəhrəman oğullarımızın misilsiz mərdliklərindən, möhtəşəm qələbəmizdən bəhs edəcək.Sonra natiq "18 may Beynəlxalq Muzeylər Günü" münasibətilə muzey əməkdaşlarını təbrik edərək onlara uğurlar arzuladı.Sonra natiq erməni vandalizminin Azərbaycana qarşı törətdiyi vəhşilikləri diqqət önünə çəkərək, Laçın rayonunun işğalı ilə muzey eksponatlarının mənfur düşmən tərəfindən dağıdılmasından, bir qisminin daşınıb Ermənistana və digər xarici dövlətlərə aparılmasından, qalanlarının isə məhv edilməsindən bəhs etdi.İ. İlyasov qeyd etdi ki, Müzəffər Ali Baş Komandan Cənab İlham Əliyevin başçılığı ilə həyata keçirilən 44 günlük Vətən müharibəsi nəticəsində torpaqlarımız işğaldan azad edildi. Artıq qayıdış başlanıb və keçmiş məcburi köçkünlər öz dədə-baba yurdlarına dönür. Digər yerlərdə olduğu kimi Laçın rayonundada quruculuq və yenidənqurma işləri sürətlə davam etdirilir. Biz o torpaqlarda əbədi yaşayacaq və Qarabağı, Zəngəzuru cənnətə çevirəcəyik.Tədbir iştirakçıları, qonaqlar öz xatirələrini bölüşdükdən sonra, İlqar İlyasov YAP Laçın rayon təşkilatının adından Laçın Tarix - Diyarşünaslıq muzeyinə​ 44 günlük müharibənin Şanlı Zəfərinə həsr olunmuş, Müzəffər Ali Baş Komandanın müdrik və qətiyyətli Liderliyindən bəhs edən.​ ”Zəfər Salnaməsi” kitabını təqdim etmişdir.Muzey rəhbərliyi təqdim olunan kitabın muzey fondu üçün ən qiymətli, dəyərli hədiyyə olduğunu bildirərək, dərin təşəkkürlərini bildirmişlər.